Esteribarko alkatea naizen aldetik, bizilagun guztiak agurtu nahi ditut, bai eta hona zuzenean etorriko diren edo era birtualean bisitan helduko zaizkigun gizon-emakume guztiak ere. Desio dut, halaber, webgune hau erabilgarria izatea bai gure ibarra ezagutzeko, bai hemen eskaintzen dugun turismo-arlo erakargarria gozatzeko. Era berean, desio dut weba tresna egokia izatea hala udal jardueraren eta albisteen berri izateko nola izapideren edo gestioren bat egiteko.

Esteribarrek 26 km ditu luzeran eta Arga ibaiak egituratua dago. Era askotako paisaiak ditu, baita herri aunitz ere, ibarrean barna barreiaturik. Zehazki, hogeita zortzi herrik osatzen dute Esteribar eta, guztira, 2.750 biztanle dira.

Lehenago, ehiztarien ibarra erraten zitzaion. Pasabidea izan da; beraz, leku aproposa giza eta kultur migrazioetarako, merkataritza harremanetarako, bai eta inbasioetarako ere. Ibarreko zati handi bat mendez mende egon da eta badago Donejakue Bidearen arrimuan, duela mila urtetik hona. Erdi Aroko zubi aunitz ditu, guztiak ere denboraren joanaren lekuko… eta elizak, jauregiak eta etxe handiak harat-honat. Errege arma ola baten arrastoak ere baditu, gaur egun zaharberritzen ari direnak, bai eta jarduerak eta paisaia harrigarriak ere.

Udal kudeaketa gardena egin nahi dugu, elkarrizketarako atea zabalik, bizilagunen iradokizun, kontsulta eta eskariei azkar eta ahalik eta hobekien erantzunez. Herri guztietako biztanleen bizi-kalitatea hobetzeko lanean ari gara, “Ibarra egin” nahian, Esteribarko aniztasun geografikoa errespetatuta eta udal zerbitzuen hobekuntza indartuta. Gure helburua da herritarrak pozik egotea beren udalaren funtzionamenduarekin.

Udalaren ordezkaria naizen aldetik eta neure izenean, eskerrak eman dizkiet web hau erabiltzen duten guztiei. Bisitariei dagokienez, sinetsirik gaude gure ibarrak ez zaituztela epel utziko eta hemengo jendeen abegi ona hartuko duzuela aintzat, bai eta haien gastronomia, historia, natura eta paisaia ere. Bizilagun maiteok, zuen esanetara nago, ez izan zalantzarik eta etorri udalera behar duzuen edozertarako, hala web honen bidez, nola zuzenean aurrez aurre.